٢٢ ربيع الأول ١٤٤٨
كلمات المقطع
حيدر من وصلها...ظل ايباوع إلها
متغيره اشكثر...من ضيم اليسر...ما يعرف شكلها
لو شفتها تنصدم يا حيدره...مو نفس ذاك الشكل متغيره
محتمل سامع أميره اميسره...بس فلا سامع عساكر ضد مره
شيّبت يم النهر بنتك تره...سمعت العباس قلها المعذره
طاحت عالشريعه...يم جف القطيعه
مكسورة قلب...و بديرة غرب...زينب وين أهلها
يالله مد جفك يحماي الحمه...هذي زينب يا بو زينب قادمه
ليك إجت كعبة صبر متهدمه...ايسلمك الله ما اجتك سالمه
لو شفت من المتن ينزل دمه...هذا من اجروحها المتزاحمه
جانت هاشمية...رجعتلك سبية
مو نفس الشكل...و آثار الحبل...من أنتي سألها
انتهه اكتاب المصايب و انطوه...و المدامع و العتب ماتن سوه
يا علي زينب تره امضيعه ضوه...هيه تتنفس حزن لا مو هوه
يا علي لو قعدت و رادت دوه...قلها أبو فاضل إجه و جايب لوه
خليها بجفنها...لا ينظر متنها
و بوسط القبر...شفيد العذر...من يتعذر إلها
يا علي امشيبه الرموش امن الهضم...و الحبل بجفوفها ايحز العظم
ضعفت و جن خيط بإبره و تنلظم...حره ما متعوده مره تنهضم
شحجي عن زينب يا بو حسين وشظم...انطبعت اجفوف بوجهها امن اللطم
ملك الموت إجاها...ابيا حاله لقاها
ميته من زمن...و امحضره الجفن...و تأخر أجلها
عدها سبع أخوه و لا منهم خبر...خمسه منهم ذبحوهم عالنهر
واحد اعله الباب و الثاني بصفر...يعني سبع أمرار كسرات الظهر
من تغمض عينها اتشاهد صور...خيمه محروقه و شمر يقطع نحر
لا أخ لا إبنها...موجوده بدفنها
ما عدها أمل...و الجف الحمل...مو جف الكفلها
يا علي رادت لحدها يتسع...خلها ويه الزهره ساعه تجتمع
يلتقي كسر الخواطر و الضلع...زينب و أمها أكو عشرة دمع
يا علي من تستمع لا تستمع...الحجي ياذي و دليلك ينصدع
و الصفعه و ألمها...تشعر بيها أمها
و الشافت ذبح...و الراس برمح...يا دمعه التهلها
زينب احجايه حجتها بمستحه...سألت أخوتها و تريد مسامحه
آني أم و مهجتي متجرحه...رايده اعله أولادي أقره الفاتحه
اتعثرت بيهم نجوم امطرحه...و اركضت لحسين أحضر مذبحه
ما جني شفتهم...مشغوله و عفتهم
لحسين الحزن...لا مو للإبن...زينب من مثلها
